ميزان الحكمة
يا ميزان الحكمة
حكم مبين اليجور و المأجور
تغلقات المصايب بالياجور
و صبح العاصر معصور
لا عشا لا فطور
طايح منشور
شحال فلقفز من عصفور
شحال من نسر حر تيدور
المصايب من القدام و اللور
الواد حمل كلشي مجرور
حتى الرياضة معطرة عطور
أما العلم سكن فالقبور
حي و ميت فسطور
حار و فنان فالحرور
يتشوط الجار و المجرور
ريحتكم عطات اكثر من البخور
دور دور
يا مول الجمر و علي فالسور
يا خالق الطرقان و النور
وريني طريقي
واخا محجوبة بألف سور و سور
اغفرلي ذنوبي وانت الرحمان الغفور
يا رافع السموات و باسط البحور
نور عقولنا بحكمتك
و نورها بداك النور
لي ما يعرفو منك مغرور
هب هبة بريحك وكشف المستور
يا الفرحان بالدنيا
الدنيا كيف سبعة ايام الباكور
يا مالين الصورة فين الشعور
يا صحاب الهيضورة فين العشور
يا الميتين بلا قبور
يا المسحورين بلا سحور
علاش تتهاجر ألأطر
فين ميزان الحكمة فالأجور
فين؟ لا يكون المسلم مسلم حتى يحب لأخيه كما يحب لنفسه
يا المغرور سول فراسك راك راجع باللور
و الله و ما صفيتي لا شربتي
و ما تنساش ما تحصد غير لي زرعتي
قصيدة من ديوان غيوانيات مجذوب
للشاعر الزجال محمد كتامي🇦🇱💖🌺💦🌺💖🌴
22/08/2020
حركة التصحيح والتجديد والابتكار في الأدب العربي 