بقلم : محمد حديش

{ زجل مغربي}

الخيل يا الخيل
~~~~

الخيلْ يَالخيلْ ؤُفينْ مَّاليكْ
سَخْفوكْ فَ الْمَحْرَكْ غْبابَرْ
نَخْوَةْ زْمانْ عْلاَّمْها تَرْزَمْ
السَّرْبا عْطَشْ بارودْها بْرَدْ
اليدْ مْحَرْفا هازَّا لَمْكاحَلْ
ؤُالشُّوفا ضْبابْ مْتَلْفا رْكابْ
تْبوريدا تْعَكْلاتْ فَ المَحْرَكْ
وَسْروجْ رْكَبْها مَجْمَعْ لْعَرَّامْ
الْعاوْدْ حَرْنَطْ ؤفينْ الرَّاكَبْ
لَڭْياطَنْ مْسَتْفا شَلاَّ عْيوطْ
قَجْ مًّاسَمْها الجَّيْحا العْدُوَّا
كَتْفاتْ رَواجْ ڭْوافَلْ الزْيارا
تْوَحَّشْ الخيلْ ريحَتْ لْمَحْرَكْ
يَتْبورَدْ نَخْوا وْيَتْحَيًّرْ فَرْحانْ
وْالنَّاسْ مْعَمْرا الموسَمْ هيتْ
كولْها زاهي مْقَصَّرْ تَفْجاجْ
نَشاطْ مْكَفَّحْ شْطيحْ الوَقْتْ
بَعْدْ الحْصادْ مْعَصَّرْ ڭْناطَرْ
زْغاريتْ مْزَهَزْها الموسَمْ
تْصَلِّي عْلى نْبينا العَدْنانْ
وَالْخيلْ تْبورْدْ هازَّا الرَّاسْ
عَلاَّمْ السَّرْبا عْريسْ الخَيْلْ
غِيرْ المْقَدًّمْ يْآمَرْ التْخْريجا
يْصَيَّحْ غَوْتا مْسَمْعا العْضامْ
وااالْخَيَّالا يْدِّيكْ عَالْمْكاحَلْ
ڭاد صْفوفْ الْخِيلْ ؤُتْحَكَّمْ
يْدِّيكْ عْلى لْقَرْصْ ياحَفيضْ
يااااحَفيضْ آاااضْرَبْ ضْرَبْ
طَلْڭا وَحْدا ڭَعْڭْعاتْ لْمَحْرَكْ
تْزَلْزَلْ لَكْلوبْ بَشْعيلْ الْبارودْ
دْخاخَنْ نَخْوَةْ سَرْبةْ الْجودْ
كولْشي يْصَفَّقْ يْحَيِّي الفُرْسانْ
مَحْلاها يَّامْ تْعودْ عَزْ مَنْ جْدودْ

ب͠ق͠ل͠م͠ م͠ح͠م͠د͠ ح͠د͠ي͠ش͠
م͠.ج͠.ح͠
16\08\2020